कोरोनामुळे जिल्ह्यात चार महिलांचा मृत्यू

विकास वाव्हळ । राष्ट्र सह्याद्री
नगर/ संगमनेर : संगमनेरमध्ये आज कोरोनामुळे तीन महिलांचा मृत्यू झाला, तर आज नव्याने पाच जण कोरोनाबाधित आढळले. राहाता तालुक्यातील एकाचा कोरोनामुळे मृत्यू झाला. एकाच दिवशी एवढे मृत्यू होण्याची ही पहिलीच घटना आहे. आता जिल्ह्यात कोरोनामुळे मृत्युमुखी पडलेल्यांची संख्या 15 झाली आहे. जिल्ह्यात आज नव्याने कोरोनाबाधित झालेल्यांची संख्या नऊ झाली आहे. संगमनेर हे कोरोना रुग्णांच्या वाढत्या संख्येमुळे अतिसंक्रमित क्षेत्र झाले आहे. त्यामुळे संगमनेर तालुक्यात घबराट व भीती निर्माण झाली आहे.

संगमनेर शहरातील नाईकवाडपुरा येथील 65 वर्षीय महिला, मोमीनपुरा येथील 63 वर्षीय महिला व तालुक्यातील शेडगाव येथील 63 वर्षांच्या महिलांचा कोरोनामुळे मृत्यू झाला आहे. राहाता तालुक्यातील एका भाजीविक्रेत्या महिलेचा कोरोनामुळे मृत्यू झाला. आज संगमनेरमध्ये नव्याने पाच कोरोनाबाधित रुग्णांची भर पडलेली आहे. मृत्यू झालेल्या दोन महिला अतिसंक्रमित क्षेत्रातील आहे, तर एक महिला या क्षेत्राच्या बाहेरची आहे. शहरातील मदिनानगर येथील 23 वर्षीय महिला व 52 वर्षीय पुरुष, नाईकवाडपुरा येथील 35 वर्षीय पुरुष, मोमीनपुरा येथील 30 वर्षीय युवक तर तालुक्यातील शेडगाव येथील 18 वर्षीय युवकाला कोरोनाची लागण झाली आहे. हा सातत्याने वाढत जाणारा आकडा पाहून प्रशासन व नागरिक ही गोंधळलेले आहेत. संगमनेरमध्ये कोरोनाबाधितांची संख्या 68 वर जाऊन पोचले आहे. संगमनेर तालुक्यात आत्तापर्यंत एकूण आठ जणांचा कोरानामुळे मृत्यू झालेला आहे. त्यात काल प्रशासनातील महत्त्वाच्या वरिष्ठ पदावर असलेल्या नायब तहसीलदार यांनाच कोरोनाची बाधा झाल्याचे स्पष्ट झाले. त्यांना तातडीने पुणे येथे उपचारासाठी दाखल करण्यात आले आहे, तर त्याच्या संपर्कात आलेल्यांचा शोध सुरू आहे. संगमनेर शहरातील ज्या ज्या भागात कोरोनाबाधित रुग्ण सापडत आहेत, तो भाग प्रशासन तातडीने सील करत आहे. काही भाग तर सुरुवातीपासूनच सील आहे, तरीदेखील त्या भागात नव्याने रुग्ण सापडत आहेत, हा काय प्रकार आहे हे नागरिकांनादेखील कोडे पडलेले आहे, तर प्रशासन ही अचंबित झाल्यासारखी दिसते. नगरपालिका प्रशासन ही युद्धपातळीवर प्रयत्न करताना दिसत आहे.
संगमनेर येथे सापडणार्‍या कोरोनाबाधित रुग्णांची संख्या पाहता संगमनेर हे आता अतिशय हॉट स्पॉट ठरत आहे. संगमनेरमध्ये सर्वत्र काळजीचे वातावरण पसरले दिसत आहे. नगर जिल्ह्यातील मृत झालेल्या महिला या 55 वर्षांपुढच्या आहेत. त्यापैकी काही महिलांवर नगर येथे उपचार सुरू आहेत. नव्याने आढळलेल्या पाच रुग्णांपैकी दोघांना संपर्कातून तर एकाला परराज्यातील प्रवासातून ही बाधा झाल्याचे समोर आले. शहरातील तीन बाधितांमध्ये 23 वर्षीय महिलेचा समावेश असून ती मदिनानगरमध्ये राहते. तर नायकवाडपुरा (पुणेनाका) येथे 35 वर्षीय तरुण बाधित आढळला आहे. याशिवाय मदिनानगरमध्येच राहणार्‍या 52 वर्षीय व्यक्तीलादेखील कोरोनाची बाधा झाली असून ही व्यक्ती वाहन चालक असून तो बंगळूरहून आला होता. जिल्ह्यात आढळलेल्या नव्या सहा रुग्णांपैकी तीन संगमनेरमधील आहे. उर्वरित बाधितापैकी दोघे राहाता तालुक्यातील आहेत, तर अन्य एकजण नगर शहरातील पंचपीर चावडी परिसरातील आहे. राहाता तालुक्यातील निमगाव निघोज येथील 23 वर्षीय व्यक्ती व राहाता शहरातील बोठे गल्ली येथील 36 वर्षीय व्यक्ती कोरोनाबाधित आढळले आहे. नगरच्या माळीवाडा भागातील पंचपीर चावडी येथील 69 वर्षीय व्यक्ती बाधित आढळली आहे.  कोरोनावर मात केलेल्या पाच व्यक्तींना आज घरी सोडण्यात आले. त्यात शेवगाव, अकोले व संगमनेरमधील प्रत्येकी एकाचा तर नगर महापालिका क्षेत्रातील दोघांचा समावेश असून आत्तापर्यत 141 रुग्णांनी कोरोनावर मात केली आहे. बाधितांचा आकडा 226 वर गेला असून अद्याप 28 अहवालांची प्रतीक्षा आहे.

3 COMMENTS

LEAVE A REPLY

Please enter your comment!
Please enter your name here