राज्य सरकारने कोरोनापुढे टेकले हात

रावसाहेब दानवे यांची टीका; सरकारमध्ये समन्वयाचा अभाव

अन्नधान्याची टंचाई नाही
’कोरोनाचे संकट किती काळ राहील, हे आता सांगता येणार नाही; पण अर्थचक्रला गती देणे गरजेचे आहे. त्यासाठी रोजगार निर्माण करून देणार्‍या कंपन्या हळूहळू सुरू होत आहेत. देशात सध्या दोन वर्षे पुरेल एवढा अन्नधान्याचा साठा असून भविष्यात अन्नधान्याची कसलीही टंचाई जाणवणार नाही,’ असे दानवे यांनी स्पष्ट केले.

विशेष प्रतिनिधी । राष्ट्र सह्याद्री
नगर : राज्यातील महाविकास आघाडी सरकारने कोरोनापुढे हात टेकले आहेत. तीन पक्षांच्या या सरकारमध्ये कोण निर्णय घेते, हे त्यांचे त्यांनाही कळत नाही. सरकारमध्ये अजिबात समन्वय नाही,’ अशी टीका केंद्रीय राज्यमंत्री रावसाहेब दानवे यांनी केली.
नगरमध्ये एका बैठकीसाठी आले असता ते पत्रकारांशी बोलत होते. कोरोनाची स्थिती राज्यात चिंताजनक असल्याचे सांगून ते म्हणाले, की देशात कोरोनाचे सर्वाधिक रुग्ण महाराष्ट्रात आहेत. महाराष्ट्रात पूर्वी एक रुग्ण जरी सापडला, तर त्या रुग्णाला रुग्णालयात दाखल केले जाई. त्याच्या कुटुंबालाही तात्काळ क्वारंटाइन केले जाई. इतकेच नव्हे, तर या कुटुंबाच्या संपर्कात आलेल्यांनाही क्वारंटाइन करण्याच्या हालचाली होत. आता चित्र वेगळे आहे. आता रुग्ण सापडला तर फक्त रुग्णाला उपचारासाठी नेले जाते किंवा घरातच क्वारंटाइन केले जाते. हे जे दुर्लक्ष होत आहे, त्यामुळे दिवसेंदिवस कोरोना साथीचा प्रादुर्भाव वाढतो आहे. आवश्यक तेवढी काळजी घेतली जात नाही. सरकारने कोरोनापुढं हात टेकले आहेत.
’काँग्रेसला महाविकास आघाडी सरकारच्या निर्णय प्रक्रियेत सहभागी करून घेतले जात नाही, असे खुद्द काँग्रेसचे नेते राहुल गांधी यांनीच सांगितले आहे. याचा अर्थच सरकारमध्ये समन्वय नाही असा निघतो,’ असे दानवे म्हणाले. विद्यापीठाच्या अंतिम वर्षांच्या परीक्षेबाबतही दानवे यांनी मत व्यक्त केले. ’अंतिम वर्षाच्या परीक्षा व्हायला हव्यात, अन्यथा त्या विद्यार्थ्यांवर ’कोरोना विद्यार्थी’ असा कायमचा शिक्का बसेल,’ अशी भीती त्यांनी व्यक्त केली.

1 COMMENT

LEAVE A REPLY

Please enter your comment!
Please enter your name here