राज्य शिक्षण आयुक्तांचा मोठा निर्णय लवकरच सुरू होणार शैक्षणिक वर्ष

0

ग्रीन झोनमध्ये वर्ग भरणार

पुणे : कोरोनाच्या पार्श्वभूमीवर शाळांमधील अध्यापन 15 जूनपासून सुरू होणार असल्याचा मोठा निर्णय राज्य शिक्षण आयुक्तांनी घेतला आहे. विद्यार्थ्यांचे शैक्षणिक नुकसान टाळण्यासाठी सुरवातीला डिजिटल प्लॅटफॉर्मद्वारे शिकवले जाणार आहे. तर ग्रीन झोनमध्ये शाळाही भरणार आहेत.

शालेय शिक्षण विभागाने शैक्षणिक वर्ष सुरू करण्यासाठी तयारी करत असून त्यासाठी शालेय शिक्षणमंत्री वर्षा गायकवाड या शिक्षण सचिव आणि शिक्षण आयुक्त यांच्या सातत्याने चर्चा करीत आहेत. त्यात येत्या 15 जूनपासून शैक्षणिक वर्ष सुरू करण्याच्या निर्णय या विभागाने घेतला आहे. त्यामुळे शाळांचे वर्ग सुरू झाले नाही, तरी अध्यापन मात्र सुरू केले जाणार आहे.

राज्याचे शिक्षण आयुक्त विशाल सोळंकी यांनी याबाबत माहिती दिली. ते म्हणाले, “विद्यार्थ्यांची सुरक्षितता महत्त्वाची आहेच; पण त्यांचे शैक्षणिक नुकसानही होऊ नये म्हणून आम्ही 15 जूनपासून शैक्षणिक वर्ष सुरू करीत आहोत. त्यामुळे अध्यापनासाठी विविध पर्यायांचा विचार करीत आहोत. सुरवातीला डिजिटल प्लॅटफॉर्मच्या माध्यमातून अध्यापन सुरू होईल. टीव्ही, स्थानिक केबल यांसह व्हर्च्युअल क्लासरूम या माध्यमातून शिकविणे सुरू होईल. ” शहरी भागात कोरोनाचा फैलाव अधिक आहे. या भागात वर्ग सुरू करता येणार नाहीत. शहरातील विद्यार्थ्यांचा विचार करता अभ्यासक्रम काही प्रमाणात कमी करण्याचाही विचार सुरू आहे. त्यासंबंधी राज्य शैक्षणिक संशोधन आणि प्रशिक्षण परिषद आढावा घेत आहे,”

टीव्ही चॅनेलबरोबर स्थानिक केबल नेटवर्कच्या माध्यमातून अध्यापनाचे व्हिडिओ विद्यार्थांपर्यंत पोचविले जाणार आहेत. शैक्षणिक कामकाज सुरू करण्याबाबत या क्षेत्रातील विविध घटकांशी चर्चा सुरू आहे. शिक्षक आणि विद्यार्थ्यांच्या सुरक्षेची खबरदारी घेऊनच अध्यापन सुरू करण्यात येणार आहे. याबाबत शिक्षणमंत्री देखील आमच्याबरोबर सातत्याने चर्चा करीत आहेत, असे सोळंकी यांनी स्पष्ट केले.

ग्रीन झोनमध्ये वर्ग भरणार
राज्यातील अनेक भागांमध्ये कोरोनाचा फैलाव झालेला नाही, अशा ग्रीन झोनमध्ये शाळा सुरू करण्याचा विचार आहे. तेथील शिक्षक आणि विद्यार्थी हे खबरदारी घेत शाळेत येऊ शकतील. याबाबत संबंधित जिल्ह्याच्या जिल्हाधिकाऱ्यांना सूचना दिल्या जाणार आहे. या भागात रुग्ण आढळलाच तर पुन्हा शाळा बंद ठेवण्याचाही पर्याय असल्याचे विशाल सोळंकी यांनी सांगितले.

LEAVE A REPLY

Please enter your comment!
Please enter your name here