शेततळ्यात विषारी द्रव टाकल्याने मत्स्य शेती उध्वस्त

0

हजारो मासे मृत, लाखोंचे नुकसान

प्रतिनिधी । राष्ट्र सह्याद्री
नेवासा : तालुक्यातील करजगाव येथे शेततळयात विषारी द्रवाने रावसाहेब गेणूजी देवखिळे या शेतकर्‍याची मत्सशेती उध्वस्त झाली आहे. या विषारी प्रयोगामुळे हजारो मासे मृत्युमुखी पडले या मध्ये शेतकर्‍याचे लाखो रुपयांचे नुकसान झाले या घटनेबाबत सोनई पोलिसांकडे तक्रार दाखल करण्यात आली आहे.
रावसाहेब देवखिळे यांचे गट नंबर 129 मध्ये दोन एकराचे साठ फूट खोलीचे पाण्याने भरलेले शेततळे गेल्या गेल्या वर्षी तयार केले होते.त्यामध्ये पन्नास फुटापर्यंत पूर्ण भरलेले पाणी होते. सदर तळयात लाखो रुपये खर्च करून शेतीसाठी हक्काचे बारमाही ठिबकद्वारे पाणी व्यवस्थापण सुरू केले होते.शेतीला जोड धंदा व बँकेचे हप्ते वेळेत जातील या हेतूने सर्व बाजूंनी दहा फुटापर्यंत काटेरी जाळीचे कम्पाउंड करून त्यामध्ये कथला, राहू, मरळ, फंगाशिया, सायप्रस या जातीचे 80 ते 90 हजार मत्स बीज सोडण्यात आले होते. या शेततळ्यात गेल्या आठ ते नऊ महिन्यापासून नियोजनानुसार दररोज खाद्य दिले जात होते.मत्स शेतीसाठी माहितीगाराद्वारे वेळोवेळी त्यांच्यासाठी आवश्यक बाबींची पूर्तता देखील केली जात होती.या शेततळयात सुमारे एक ते दोन किलो वजनाची मासे ही तयार झाली होती.मत्स खरेदीसाठी व्यापारी वर्ग देखील या शेततळयावर येत होता.
दोन दिवसांपूर्वी शेततळयाचे मालक रावसाहेब देवखिळे हे माशांना खाद्य घेऊन सकाळी शेततळयावर आले असता त्यांना हजारो मासे मृत होऊन शेततळयावर तरंगत असतांना निदर्शनास आले.तसेच शेत तळयातील स्वच्छ असलेले पाणी देखील काळपट झाल्याचे निदर्शनास आले असून हा अज्ञात व्यक्तीकडून विषबाधा करण्याचा प्रकार असल्याचा प्राथमिक अंदाज शेतकरी रावसाहेब देवखिळे यांनी तक्रारी अर्जात व्यक्त केला आहे. सदरचा तक्रारी अर्ज शेतकरी रावसाहेब देवखिळे यांनी सोनई पोलीस स्टेशनला दिला असून सहायक पोलीस निरीक्षक जनार्दन सोनवणे यांनी आपल्या पोलीस फौजफाटयासह घटनास्थळी दाखल झाले त्यांचे समवेत डॉ अंकुश देवखिले, बालासाहेब भदगले, अँड.विठ्ठलराव देवखिळे, पत्रकार बाळासाहेब देवखिळे, चंद्रकांत ढवळे, गणेश लोहकरे उपस्थित होते. सर्व बाजूनी पहाणी करून पाण्याचे व माशाचे नमुने पंचनामा करून तपासणीसाठी नाशिक येथे पाठविण्यात आले.
देवखिळे यांनी दिलेल्या तक्रारीनुसार विविध जातीचे 100 ग्रॅम पासून ते दोन किलो पर्यंत वजनाचे 20 ते 22 हजार माशे मृत झाल्याने अंदाजे पाच ते सहा लाख रुपयाचे नुकसान झाले असल्याचे म्हटले आहे. या तक्रारी वरून हा प्रकार कोण्या अज्ञात इसमाने केला की इतर गोष्टीमुळे झाला हे अहवाल आल्यावरच याबाबत चित्र स्पष्ट होईल.

LEAVE A REPLY

Please enter your comment!
Please enter your name here