Karjat : कोरोनाचा दुसरा रुग्ण आढळल्याने शहर पुन्हा तीन दिवसासाठी लॉकडाऊन

0

प्रतिनिधी | राष्ट्र सह्याद्री 

प्रतिनिधी | राष्ट्र सह्याद्री दि १८

कर्जत : कर्जत शहरात शनिवारी सकाळी पुन्हा कोरोना रुग्ण आढळल्याने खबरदारीचा उपाय म्हणून कर्जत नगरपंचायतीच्या रविवारपासून तीन दिवस जनता कर्फ्यु पाळण्याचा निर्णय पदाधिकारी बैठकीत घेण्यात आला आहे. कर्जत शहरातील कोरोना रुग्णाची संख्या आता दोन झाली असून नागरिकांनी विशेष काळजी घेण्याचे आवाहन नगराध्यक्षा प्रतिभा भैलुमे आणि उपनगराध्यक्ष नामदेव राऊत यांनी केले आहे. 
मागील अनेक महिन्यापासून जिल्ह्यासह सर्वच शहर आणि तालुक्यात कोरोनाने मोठे थैमान घातले होते. मात्र कर्जत तालुका सुरक्षित राहिला होता मात्र मागील मे महिन्यात दि २२ ला कोरोनाचा पहिला रुग्ण तालुक्यातील राशीन भागात आढळला. आणि तालुक्यात कोरोनाने प्रवेश केला. राशीन पाठोपाठ, सिद्धटेक, अळसुंदे, माही जळगाव आणि पाटेगाव येथे कोरोना बाधीत रुग्ण आढळले. अनेक महिन्यापासून कर्जत शहर यातून अलिप्त होते मात्र बुधवारी त्यास ही नजर लागली आणि शहरात वैद्यकीय व्यवसाय करणारे प्रसिद्ध डॉक्टर यांनाच कोरोनाची लागण झाली.
कोरोनामुक्त असणारे कर्जत शहर तात्काळ सतर्क करण्यात आले. तो परिसर प्रतिबंधित करण्यात आला. मात्र शनिवारी सकाळी पुन्हा प्रथम बाधीत व्यक्तीच्या संपर्कातील दुसरा व्यक्ती कोरोना बाधीत आढळल्याने कर्जत शहरात भीतीयुक्त वातावरण निर्माण झाले. कर्जत नगरपंचायतीमध्ये तात्काळ पदाधिकारी यांनी बैठक घेत शहराच्या सुरक्षिततेसाठी आणि कोरोना साखळी खंडित करण्यासाठी पुन्हा शहर लॉकडाऊन करण्याचा निर्णय घेण्यात आला. यावेळी दि १९ ते २१ जुलैपर्यंत अत्यावश्यक सेवा वगळता इतर सर्व व्यवहार तीन दिवसासाठी बंद करण्यात येईल असा एकमुखी निर्णय करण्यात आला. त्याअनुषंगाने रविवार ते मंगळवारपर्यंत कर्जत शहर आणि बाजारपेठ पूर्णपणे बंद राहणार आहे.

LEAVE A REPLY

Please enter your comment!
Please enter your name here