खून प्रकरणातील सात आरोपी जेरबंद; तीघे फरार

शिर्डी: परिसरातील निमगाव येथील किराणा दुकानदाराच्या खूनप्रकरणातील सात आरोपींना पोलिसांनी जेरबंद केले आहे. तीन आरोपी पसार असून त्यांचा पोलीस कसोशिने शोध घेत आहेत.

शिर्डी पोलीस ठाण्यात तक्रार दाखल केल्याचा राग मनात धरून ११ जणांनी रवींद्र साहेबराव माळी (रा. पंधरा चारी, निमगाव, साई श्रद्धा किराणा स्टोअरसमोर) यांचा मानेवर चाकूने वार करून खून केल्याची खळबळजनक घटना १९ नोव्हेंबर रोजी रात्री साडेदहाच्या सुमारास घडली होती. निमगाव ग्रामपंचायत हद्दीत शासकीय विश्रामगृहानजीक रवींद्र माळी राहात होते; मात्र त्यांचे व आरोपींचे काही कारणावरून भांडण झाले होते. त्यामुळे त्यांनी शिर्डी पोलीस ठाण्यात गुन्हा दाखल केला होता. याचा आरोपींच्या मनात राग होता.

त्यामुळे गुरुवारी रात्री आरोपी विशाल रमेश पाटील (रा. चांगदेवनगर, निमगाव), रवींद्र बनसोडे (रा. जोशी शाळा), समीर शेख (रा. राहाता) यांनी माळी यांना धरून ठेवले व अन्य आरोपी अज्जू पठाण (रा. निमगाव), रंजना वैजनाथ भांगे, ललिता रमेश पाटील (दोघी रा. निमगाव), सुनील लोखंडे, अक्षय शिंदे, महेश गायकवाड, कुणाल जगताप, अजय वैजनाथ भांगे यांनी त्यांच्या हातातील धारदार चाकूने मयत रवींद्र माळी याच्या मानेवर जोराने वार करून त्यांचा खून केला. याप्रकरणी मयताचा मुलगा रोहित माळी (वय १६) याने शिर्डी पोलीस ठाण्यात आरोपींविरोधात दिलेल्या फिर्यादीवरून भा.दं.वि. कलम ३०२, १२० (ब), १४३, १४७, १४८, १४९, ५०४, ५०६ प्रमाणे गुन्हा दाखल करण्यात आला आहे.

चार ते पाच दिवसांपूर्वी त्यांचे वाद झाले होते. मुख्य आरोपी फरार असल्याने मयताच्या नातेवाईकांकडून पोलीस स्टेशनच्या परिसरात संतप्त व्यक्त करत लवकरात लवकर आरोपींना अटक करा अन्यथा शिर्डी पोलीस स्टेशनसमोर मृतदेह आणून ठेवू, असे सांगण्यात आले होते. या प्रकरणी अप्पर पोलीस अधीक्षक डॉ. दीपाली काळे, पोलीस उपअधीक्षक संजय सातव, पोलीस निरीक्षक प्रवीण लोखंडे यांनी घटनास्थळी भेट दिली. या गुन्ह्यातील सात आरोपींना पोलिसांनी अटक केली असून मुख्य संशयित तीन जण पसार आहेत.

त्यांचा शोध घेण्यासाठी तीन पथके तपासासाठी पाठविण्यात आले आहेत. पुढील तपास पोलीस निरीक्षक प्रवीण लोखंडे करीत आहेत. या हेलिपॅड रोड व लगतच्या परिसरात तीन वर्षांत जवळपास सहा खुन झाले आहेत. या परीसरात अवैध व्यवसाय मोठ्या प्रमाणावर वाढले आहेत. या ठिकाणी कायम गुन्हेगारी क्षेत्रातील लोकांचा वावर असतो. खुन, खुनाचा प्रयत्न, पाकिटमारी, मारहाण, लुटमार यासारख्या घटना घडलेल्या आहेत.

ही गुन्हेगारी रोखण्यासाठी पोलिसांनी ठोस उपाययोजना करण्यासाठी पुढाकार घेतला पाहिजे, अशी मागणी कैलास कातोरे, उपसरपंच अजय जगताप, किरण पाटील, धनंजय पाटील, भानुदास कातोरे, मंगेश कातोरे यांनी केली आहे.

3 COMMENTS

LEAVE A REPLY

Please enter your comment!
Please enter your name here