पाकिस्तानमार्गे ६०० कोटींचे हेरॉईन गुजरातमध्ये!

पोलिसांचा छापा; १२० किलो हेरॉईनसह अंतरराष्ट्रीय टोळीतील तिघे जेरबंद 


अहमदाबाद

गुजरातमधील दहशतवादविरोधी पथकाने मोठी कारवाई केली आहे. मोरबी जिल्ह्यातील झिंझुडा गावात १२० किलो हेरॉइन पकडले आहे. जप्त केलेल्या हेरॉइनची किंमत अंदाजे ६०० कोटी रुपये आहे. या कारवाईत एटीएसने तीन जणांना अटक केली आहे.

एटीएसच्या पथकाने मोरबी जिल्ह्यात स्थानिक पोलिसांच्या मदतीने ही धडक कारवाई केली आहे. या कारवाईत मुख्तार हुसैन उर्फ जब्बार जोडिया, शमसुद्दीन हुसैन सय्यद आणि गुलाम हुसैन उमर भागड या तिघांना अटक केली आहे. प्राथमिक चौकशीत धक्कादायक माहिती हाती लागली आहे. पाकिस्तानच्या बोटीतून हेरॉइनची खेप आणण्यात आली होती. समुद्रीमार्गे मुख्तार आणि गुलाम यांनी ते गुजरातमध्ये आणले होते. पाकिस्तानमधील झाहिद बशीर बलूच याने हे ड्रग्ज पाठवले होते. झाहिद बशीर हा २०१९ मध्ये जे २२७ किलो हेरॉइन जप्त केले होते, त्या प्रकरणातील हा फरार आरोपी आहे, अशी माहिती मिळाली आहे.

एटीएसचे पोलीस उपअधीक्षक के. के. पटेल यांना इंटेलिजन्सकडून माहिती मिळाली होती. आरोपी मुख्तार हुसैन उर्फ जब्बार जोडिया आणि गुलाम भागड हे दोघे ड्रग्ज समुद्रीमार्गे घेऊन येत असल्याची माहिती होती. हे दोघेही अनुक्रमे द्वारकामधील जामनगर आणि सलाया या ठिकाणचे रहिवासी आहेत. मिळालेल्या माहितीच्या आधारे एटीएसने सापळा रचला. पोलीस उपअधीक्षक भावेश रोजीया यांच्या नेतृत्वाखाली एका निर्माणधीन घरावर छापा मारला. तेथून १२० किलो हेरॉइन जप्त करण्यात आले. आंतरराष्ट्रीय बाजारात या ड्रग्जची किंमत अंदाजे ६०० कोटी रुपये आहे.

हेरॉइनची खेप भारतातील तस्करांना दिली जाणार होती. त्यानंतर त्यांच्यामार्फत ती आफ्रिकन देशांमध्ये पाठवण्यात येणार होती, अशी माहिती मिळाली आहे. गुजरातचे गृहमंत्री हर्ष संघवी यांनी सांगितले की, गुजरात पोलिसांनी आणखी एक मोठी कारवाई केली आहे. ड्रग्ज माफियांचे कंबरडे मोडण्यात गुजरात पोलीस आघाडीवर असल्याचे ते म्हणाले. गुजरात एटीएसचे डीआयजी हिमांशू शुक्ला म्हणाले की, गुजरात एटीएसने गेल्या वर्षभरात जवळपास १३२० कोटी रुपयांचे ड्रग्ज जप्त केले आहेत. अफगाणिस्तान आणि पाकिस्तानमधून हे ड्रग्ज भारतात मोठ्या प्रमाणात आणले जाते, असे शुक्ला यांनी पत्रकार परिषदेच सांगितले.

--------------------------------

महिनाभरापूर्वी २१ हजार कोटींचे हेरॉईन जप्त 

महिनाभरापूर्वीच डीआरआयने जवळपास ३ हजार किलो हेरॉइन जप्त केले होते. त्याची किंमत जवळपास २१ हजार कोटी रुपये इतकी होती. कच्छमधील मुंद्रा बंदर येथून सप्टेंबरमध्ये हे हेरॉइन जप्त केले होते. अफगाणिस्तानमधून हे ड्रग्ज गुजरातमध्ये आणण्यात आले होते.


टिप्पणी पोस्ट करा

0 टिप्पण्या