POLITICS: विकासासाठी सरकारबरोबर तरी शरद पवारांचा आशीर्वाद : आ. काळे

कोपरगांव : परदेशातून येताच उपमुख्यमंत्री अजित पवार यांची भेट घेतली आणि मतदारसंघाच्या विकासासाठी त्यांना पाठिंबा देत सरकारमध्ये सामील झालो. त्यानंतर शरद पवार यांची भेट घेतली असून त्यांचा आशीर्वाद ही कायम असल्याचे राष्ट्रवादीचे आमदार अशुतोष काळे यांनी सांगितले. 

आ. आशुतोष काळे म्हणाले की, परदेशात असताना अजित दादांचा फोन आला होता. कुठे आहे? विचारलं, मी त्यांना प्रदेशात असल्याचे सांगितल्यावर आल्यावर माझी भेट घे, एवढेच त्यांनी सांगितलं. त्यानंतर दोन दिवसांनी सोशल मीडियावर राज्यातील घडामोडी समजल्या. त्यावेळी मनात आलं, असं कसं घडलं, दोन पक्ष सत्तेत असताना आपला तिसरा पक्ष त्यात कसा जाईल. मात्र काहीतरी विचार करूनच निर्णय झाला असेल, असं मला वाटलं. दरम्यान परदेशातून आल्यानंतर अजितदादांना भेटलो. मतदार संघातील विकास काम मार्गी लागतील, असा आश्वासन दादांनी या यावेळी दिले. महाविकास आघाडीच्या काळातही दादांनी मला मदत केली होती. एवढं बोललो आणि त्या ठिकाणाहून अजित दादांना पाठिंबा देऊन मतदारसंघात आलो. 

काळे पुढे म्हणाले की, काळे आणि पवार कुटुंबीयांचे तीन पिढ्यांचे संबंध आहेत. माझे आजोबा शरद पवार मुख्यमंत्री झाले, तेव्हा त्यांच्या मंत्रिमंडळात मंत्री होते. पवार कुटुंब आज एकत्र आहे, वैचारिकदृष्ट्या दोन वेगळ्या भूमिका असल्या तरी भविष्यकाळात राष्ट्रवादी काँग्रेससुद्धा एक परिवार म्हणूनच समोर येईल, याची मला खात्री वाटते. पवार साहेबांना मानणारे आम्ही कार्यकर्ते असून वैचारिक दृष्ट्या सुद्धा एकत्र आणण्यासाठी आम्ही प्रयत्न करू. तसेच अजित दादा बरोबर जाण्याचा निर्णय घेतल्यावर शरद पवार साहेबांना सुद्धा भेटलो. साहेबांचा आशीर्वाद आमच्यावर कायम आहे. रयत शिक्षण संस्थेवर तुम्ही काम करत आहात, मात्र या संस्थेत आपण राजकारण करत नाही, याची काळजी घ्या, असा सल्लाही यावेळी शरद पवार यांनी दिला.