औरंगाबाद: शहरातील जाधववाडी परिसरात एक धक्कादायक प्रकार समोर आला असून देशी दारूच्या दुकानासमोर पडलेल्या कचऱ्याच्या ढिगाराखाली मृत अर्भक आढळून आल्याने खळबळ उडाली आहे. घटनेची माहिती मिळताच पोलीस आणि आरोग्य विभागाच्या पथकाने घटनास्थळी धाव घेत मृत्यू अर्भक शवविच्छेदनासाठी घाटी रुग्णालयात पाठवले आहे.
पोलिसांनी दिलेल्या माहितीनुसार, एन-७ भागात आपल्या कर्तव्यावर असणारे स्वच्छता निरीक्षक सूरज सुर्यदास भंडारी यांना सकाळी ९.१५ मिनिटांनी मुख्य स्वच्छता निरीक्षक रवी कुलकर्णी यांचा फोन आला,ज्यात जाधववाडी येथील मोंढा देशी दारू दुकानाच्या समोर असलेल्या मोकळ्या मैदानात पाच-सहा महिन्याचे अर्भक कचऱ्याच्या ढिगाऱ्याखाली आढळून आल्याची माहिती दिली. त्यानंतर पोलिसांना सुद्धा ही माहिती देण्यात आली. त्यानंतर आरोग्य विभागाच्या पथकाने अर्भकाची तपासणी करत घाटी रुग्णालयात हलवले.
रोज सकाळी मनपाच्या स्वच्छता विभागाच्या कर्मचाऱ्यांकडून शहरात साफसफाई केली जाते. रस्त्यावरील कचरा, झाडू मारणे आणि कचऱ्याचे पडलेले ढिगारा गाडीत टाकून नेण्याचे काम ते करतात. नेहमीप्रमाणे मनपाचे सफाई कामगार संजय काशिनाथ बोऱ्हाडे जाधववाडी येथे कचऱ्याच्या ढिगार उचलत असताना त्यांना त्याठिकाणी नवजात अर्भक मिळून आला. त्यामुळे त्यांना धक्काच बसला. त्यानंतर याची माहिती त्यांनी तात्काळ वरिष्ठांना दिली.
0 टिप्पण्या