'हिजाब गर्ल' प्रकरण तापलं!


पोलिसांनी परवानगी नाकारल्याने 'वंचित'ची न्यायालयात धाव

औरंगाबाद:वंचित बहुजन आघाडी आणि मुस्लिम इत्तेहाद फ्रंट यांची आज ( सोमवारी ) शहरातील आमखास मैदानावर होणाऱ्या सभेला औरंगाबाद शहर पोलिसांनी परवानगी नाकारल्याने आता वंचितने थेट न्यायालयात धाव घेतली आहे. त्यामुळे हे प्रकरण आता अधिकच तापण्याची शक्यता आहे. तर पोलिसांनी हिजाब गर्ल मुस्कान खान हिला सुद्धा नोटीस पाठवली असून शहरात येण्यास बंदी घातली आहे.

वंचित बहुजन आघाडीच्या सभेला काही तास शिल्लक राहिले असताना औरंगाबाद शहर पोलिसांकडून सभेला परवानगी नाकारण्यात आली आहे. तर याविरोधात वंचीतने न्यायालयात धाव घेतली आहे. यावर बोलताना वंचितचे प्रवक्ते सिद्धार्थ मोकळे म्हणाले की, आम्ही पोलीस मुख्यालयात आयुक्तांना भेटून परवानगीबाबतचे पत्र त्यांना आणि स्थानिक पोलीस ठाण्यात दिले होते. त्यानंतरही वरिष्ठ पोलीस अधिकाऱ्यांसोबत आमच्या दोन बैठका झाल्या त्यादरम्यान आम्ही सर्व सहकार्य करू असे पोलिसांकडून सांगण्यात आले होते. मात्र आज कार्यक्रम असताना पोलिसांनी काल रात्री ११ वाजता परवानगी नाकारल्याची माहिती दिली असल्याचं मोकळे म्हणाले.


तर, मुस्कान खानला सुद्धा नोटीस बजावणात आली आहे. त्यामुळे या सर्वांच्या विरोधात आम्ही उच्च न्यायालयात याचिका दाखल करत आहोत. आमचे वकील न्यायालयात दाद मागण्यासाठी पोहोचले असल्याची माहिती मोकळे यांनी दिली आहे. तर बेकायदेशीरपणे हे सर्व थांबवले जात आहे. करोना काळात संजय राऊत यांच्या नेतृत्वाखाली प्रचंड मोठा असा मोर्चा निघतो आणि तो प्रसशासनाला चालतो. भाजपसह अनेक पक्ष असे कार्यक्रम घेत असताना त्यावर कोणताही आक्षेप घेतला जात नाही. मात्र वंचित पैगंबर मोहम्मद साहेब यांच्या नावाने होणाऱ्या कायद्याच्या प्रबोधनासाठी आम्ही कार्यक्रम घेत असू तर त्याला थांबवण्याच प्रयत्न केला जात आहे. त्यामुळे आम्हाला वाटते पोलीस राजकीय हेतून प्रेरित ही कारवाई करत आहे की काय?, असं आम्हाला वाटत असल्याचं मोकळे म्हणाले.


मुस्कान खानला नोटीस


या प्रकरणात औरंगाबाद शहर पोलिसांनी हिजाब गर्ल मुस्कान खानलाही नोटीस पाठवली आहे. तसेच शहरात कायदा व सुव्यवस्थेचा प्रश्न निर्माण होण्याची शक्यता असल्याने मुस्कानला शहरात प्रवेशबंदी करण्याचा आदेश पोलीस आयुक्त निखिल गुप्ता यांनी काढले आहे.


प्रकाश आंबेडकर यांची पत्रकार परिषद


काही तास शिल्लक असताना वंचित बहुजन आघाडीच्या सभेला औरंगाबाद शहर पोलिसांनी परवानगी नाकारली आहे. त्यानंतर आता वंचितने न्यायालयात धाव घेतली आहे. तरी या सगळ्या प्रकरणावर बोलण्यासाठी वंचित बहुजन आघाडीचे प्रमुख प्रकाश आंबेडकर यांनी पाच वाजता औरंगाबादमध्ये पत्रकार परिषद बोलावली आहे. त्यामुळे यावर आंबेडकर हे काय बोलणार हे पाहणं महत्त्वाचं ठरणार आहे. 

टिप्पणी पोस्ट करा

0 टिप्पण्या