Breaking News

अहमदनगरच्या वकिलाने खासदार विखेंना दिला कायदेशीर इशारा

 



अहमदनगर:
महाविकास आघाडीवर टीका करताना नवरा-बायको-वऱ्हाडीची उमपा देणारे खासदार डॉ. सुजय विखे यांना सर्वपक्षीय नेत्यांनी कडक शब्दांत उत्तर दिलं आहे. या पार्श्वभूमीवर नगरमधील राष्ट्रवादी काँग्रेसचे समर्थक वकील अ‍ॅड. सुरेश लगड यांनी विखेंना थेट कायदेशीर इशारा दिला आहे. ‘आपण महाविकास आघाडी सरकारबद्दल जे वर्णन केलं आहे, ते निश्चितच बदनामी करणारं आहे. ते फौजदारी व दिवाणी अशा दोन्ही प्रकारच्या कारवाईत मोडतं,’ असा इशारा देत विखेंना माफी मागण्याचा सल्ला अॅड. लगड यांनी दिला आहे. 

अ‍ॅड. सुरेश लगड यांनी महटलं आहे की, ‘आपण समाजात वावरताना पूर्ण विचारांती बोललं पाहिजे. महाविकास आघाडीला नवरा-बायको व वऱ्हाडीची उपमा देऊन अतिशय खालच्या पातळीवर जाऊन राजकारण करत आहात. आपणास हे शोभत नाही. केवळ सवंग प्रसिद्धीसाठी असे शब्दप्रयोग वापरु नयेत. वडीलकीच्या नात्यानं मी आपणास हे सांगू इच्छितो. त्याचा राग येऊन देऊ नये,’ असेही अ‍ॅड. लगड यांनी म्हटलं आहे.

डॉ. विखे यांना उद्देशून लगड यांनी म्हटलं आहे, ‘आपण वयानं खूप लहान आहात. आपण काय बोलतो? कुणाबद्दल बोलतो? आपल्या चुकिच्या बोलण्यानं दुसऱ्याच्या मनावर काय परिणाम होऊ शकतो? याचं थोडातरी भान ठेवायला हवं. आपण महाविकास आघाडी सरकारचं जे वर्णन केलं ती निश्चितच महाविकास आघाडी सरकारची जाणीवपूर्वक केलेली बदनामी आहे. आपल्यासारख्या लोकप्रतिनिधींच्या तोंडून अशी असंसदीय भाषा शोभत नाही. आपण अज्ञान असताना आपले पिताश्री, आपले सहकार महर्षी आजोबा व आपल्या मातोश्री असे सर्वच काँग्रेस पक्षात होते. काँग्रेसनं आपल्या कुटुंबाला अनेक मोठी पदं दिली. आपल्या मातोश्री अहमदनगर जिल्ह्याच्या जिल्हा परिषद अध्यक्ष झाल्या. पक्षसंघटनेतही आपल्या कुटुंबाला वेळोवेळी पक्षानं संधी दिली. याची आपल्या सारख्या लोकप्रतिनिधीला माहिती असूनही आपण काँग्रेसवर व महाविकास आघाडी सरकारमधील राष्ट्रवादी काँग्रेस व शिवसेना या पक्षांबद्दल अतिशय खालच्या पातळीवर जाऊन बदनामी करीत आहात. हे बरोबर नाही.'

'तुम्ही व तुमचे पिताश्री राज्यात सत्तेवर नसल्यानं आपली अडचण झाली. त्यामुळं आपण आपला राग व्यक्त करण्यासाठी ऊठसूठ बेताल वक्तव्य करीत आहात. आपण महाविकास आघाडी सरकारबद्दल जे वर्णन केलं आहे ते निश्चितच बदनामी करणारं आहे. ते फौजदारी व दिवाणी अशा दोन्ही प्रकारच्या कारवाईत मोडतं. त्यामुळं केलेल्या चुकीच्या वक्तव्याबद्दल महविकास आघाडी सरकारची जाहीर माफी मागावी’, अशी मागणीही अ‍ॅड. लगड यांनी केली आहे.


No comments