विधान परिषदेचे माजी आमदार अरुण जगताप यांचे निधन

 विधान परिषदेचे माजी आमदार अरुण जगताप यांचं पहाटे निधन ; 

संग्राम जगताप यांना पितृ शोक

 अहिल्यानगर :

 येथील माजी आमदार अरुणकाका बलभीमराव जगताप (वय ६७) यांचे आज पहाटे अल्पशा आजाराने निधन झाले. पुणे येथील एका खासगी रुग्णालयात त्यांच्यावर उपचार सुरू होते. त्यांच्या मागे पत्नी, दोन मुले, एक मुलगी, सुना, नातवंडे असा परिवार आहे.

अहिल्यानगर शहराचे आमदार संग्राम जगताप यांचे ते वडील होते.

दिवंगत अरुणकाका जगताप यांनी युवक कॉंग्रेसच्या अध्यक्षपदापासून आपल्या राजकारणाचा श्रीगणेशा केला. नगरपालिकेत ते नगरसेवक झाले. सलग पाच वर्ष ते तत्कालीन अहमदनगर नगरपालिकेचे अध्यक्ष राहिले. दोनवेळा ते विधानपरिषदेवर निवडून गेले. जिल्हा बँकेचे संचालक म्हणूनही त्यांनी काम केले. जिल्हा क्रिकेट असोसिएशनचे अध्यक्ष म्हणूनही त्यांनी क्रीडा क्षेत्रात ठसा उमटवला.

दिवंगत जगताप यांच्या पार्थिवावर आज सायंकाळी चार वाजता अहिल्यानगर येथील अमरधाम स्मशानभूमीत अंत्यसंस्कार करण्यात येणार आहेत. त्यापूर्वी त्यांचे पार्थिव भवानीनगर येथील त्यांच्या निवासस्थानी अंत्यदर्शनासाठी ठेवण्यात येईल.