अहिल्यानगर :
जिल्ह्यातीलउच्च शिक्षण क्षेत्रात करिअर घडविण्याची वाट पाहणाऱ्या तरुणांसाठी दिलासादायक बातमी समोर आली आहे. राज्य शासनाने महाविद्यालयांमधील सहाय्यक प्राध्यापकांच्या हजारो रिक्त पदांसह ग्रंथपाल आणि शारीरिक शिक्षण संचालक पदांच्या भरतीलाही मंजुरी दिल्याने स्थानिक पातळीवर रोजगाराच्या नव्या संधी निर्माण होणार आहेत.
अहिल्यानगरसह पुणे व नाशिक विभागातील महाविद्यालयांना आता या तिन्ही संवर्गांची एकत्रित रोस्टर तपासणी करण्याची प्रक्रिया सुरू करावी लागणार आहे. 1 ऑक्टोबर 2025 रोजीच्या विद्यार्थी संख्येच्या आधारे पदांची संख्या निश्चित करण्यात आली असून, त्यानुसार महाविद्यालयांना विषयनिहाय माहिती देण्यात आली आहे.
या निर्णयामुळे अनेक वर्षांपासून भरतीची प्रतीक्षा करणाऱ्या पात्र उमेदवारांना मोठा दिलासा मिळाला आहे. विशेष म्हणजे, केवळ प्राध्यापकच नव्हे तर ग्रंथालय व क्रीडा क्षेत्रातील तज्ञांनाही समान संधी मिळणार असल्याने शिक्षण व्यवस्थेला सर्वांगीण बळकटी मिळण्याची अपेक्षा व्यक्त होत आहे.
दरम्यान, शासनाच्या निर्देशानुसार आरक्षणाची अचूक अंमलबजावणी करण्यासाठी मागासवर्ग कक्षामार्फत बिंदू नामावली (रोस्टर) तपासणी केली जाणार आहे. ही प्रक्रिया पूर्ण झाल्यानंतरच प्रत्यक्ष रिक्त पदांची स्पष्ट संख्या समोर येईल आणि त्यानुसार भरती प्रक्रिया राबविण्यात येणार आहे.
अहिल्यानगर जिल्ह्यातील अनेक युवक-युवती उच्च शिक्षण क्षेत्रात करिअर करण्यासाठी पात्र असून, या भरतीमुळे त्यांच्या आशा पुन्हा एकदा उंचावल्या आहेत. “आता तरी भरती प्रक्रिया वेळेत पूर्ण होऊन आम्हाला संधी मिळेल,” अशी अपेक्षा उमेदवारांकडून व्यक्त होत आहे.
एकूणच, या निर्णयामुळे केवळ नोकरीच्या संधीच वाढणार नाहीत, तर जिल्ह्यातील शिक्षणाचा दर्जाही उंचावण्यास मदत होणार आहे.
0 टिप्पण्या