संगमनेर खुर्द येथे आयोजित अखंड हरिनाम सप्ताहाच्या निमित्ताने आयोजित कार्यक्रमात बाळासाहेब थोरात

"पसायदान हे मानवतेच्या कल्याणाचे महाकाव्य, वारकरी संप्रदाय समतेचा आधार!" – बाळासाहेब थोरात

संगमनेर (प्रतिनिधी):

"शेकडो वर्षांची परंपरा लाभलेला वारकरी संप्रदाय हा केवळ भक्तीचा मार्ग नसून तो सर्व समाजाला, अठरापगड जाती-धर्माला एकत्र घेऊन चालणारा समतेचा विचार आहे. संत ज्ञानेश्वरांनी दिलेले 'पसायदान' हे संपूर्ण मानवजातीच्या कल्याणासाठी असून, आजच्या युद्धाच्या आणि संघर्षाच्या वातावरणात जगाला पसायदानातील शांततेच्या विचाराचीच गरज आहे," असे प्रतिपादन काँग्रेसचे ज्येष्ठ नेते व माजी महसूल मंत्री बाळासाहेब थोरात यांनी केले.

बुवाबाजीला थारा नाही, केवळ मानवतेची सेवा!

वारकरी संप्रदायाचे वैशिष्ट्य सांगताना थोरात यांनी स्पष्ट केले की, या संप्रदायात अंगारे-धुपारे, गंडे-दोरे किंवा कोणत्याही प्रकारच्या बुवाबाजीला थारा नाही. हा संप्रदाय शुद्ध आचरण आणि भेदाभेदविरहित समाजाची निर्मिती करतो. हाच शुद्ध विचार आपल्याला पुढील पिढीपर्यंत पोहोचवायचा आहे.

संगमनेरचा विकास हीच ईश्वरसेवा - ह.भ.प. कविराज महाराज झावरे

यावेळी कीर्तनरूपी सेवा देताना ह.भ.प. कविराज महाराज झावरे म्हणाले की, "वारकरी संप्रदायाचा सर्वसमावेशक विचार आचरणात आणणारे नेतृत्व म्हणजे बाळासाहेब थोरात. त्यांनी सर्वांना सामावून घेत संगमनेर तालुक्याला राज्याच्या नकाशावर अव्वल स्थानी नेले आहे. प्रत्येकाने आपल्या क्षेत्रात प्रामाणिकपणे काम करणे, हीच खरी ईश्वरसेवा आहे."

भक्तांची मांदियाळी

या सोहळ्यासाठी संगमनेर खुर्दसह परिसरातील भाविक, महिला आणि तरुण वर्ग मोठ्या संख्येने उपस्थित होता. गावकऱ्यांच्या वतीने बाळासाहेब थोरात यांचा विशेष नागरी सत्कार करण्यात आला. कार्यक्रमाला आर. एम. कातोरे, एस. पी. गोडसे, गणेश शिंदे, रोहिणी गुंजाळ, श्वेता मंडलिक यांसह अनेक मान्यवरांची उपस्थिती होती.