मराठा आरक्षणासाठी स्वतंत्र कक्ष स्थापन

 राधाकृष्ण विखे पाटील यांनी मानले मुख्यमंत्री देवेंद्र फडणवीस यांचे आभार...

मराठा समाजाच्या हक्कासाठी आणखी एक ऐतिहासिक निर्णय घेत सामान्य प्रशासन विभागात स्वतंत्र ‘मराठा आरक्षण कक्ष’ स्थापन करण्यात आला आहे. या कक्षामुळे मराठा आरक्षणासंदर्भातील न्यायालयीन प्रक्रियेला वेग मिळणार असून आरक्षणाची कायदेशीर बाजू अधिक प्रभावीपणे मांडली जाणार आहे. तसेच एसईबीसी प्रवर्गातील नियुक्त्या, शिष्यवृत्ती आणि वसतिगृहांशी संबंधित प्रश्नांचा समन्वय साधून विद्यार्थ्यांना अधिक जलद लाभ मिळण्यास मदत होणार आहे.
‘सारथी’ संस्था आणि अण्णासाहेब पाटील आर्थिक विकास महामंडळाच्या विविध योजनांची प्रभावी अंमलबजावणी सुनिश्चित करून त्या अधिकाधिक युवकांपर्यंत पोहोचविण्याचे कामही या कक्षामार्फत केले जाणार आहे. याशिवाय हैदराबाद गॅझेटमधील कुणबी नोंदींच्या पडताळणीसाठी विशेष कार्यपद्धती (SOP) राबविण्यात येणार असून जिल्हाधिकारी कार्यालयांमध्ये हेल्पलाईन सुविधा उपलब्ध करून प्रक्रिया अधिक सुलभ केली जाणार आहे.
मराठा समाजाच्या विकासासाठी, न्याय्य हक्कांसाठी आणि शासनाच्या योजनांचा लाभ अधिक प्रभावीपणे पोहोचविण्यासाठी उचललेले हे एक महत्त्वपूर्ण पाऊल आहे.