अहिल्यानगर:- शेअर बाजारामध्ये पैसे गुंतवल्यास मोठ्या प्रमाणावर नफा मिळवून देण्याचे आमिष दाखवून एका तरुणासह इतरांची तब्बल ५८ लाख ८० हजार रुपयांची आर्थिक फसवणूक केल्याची धक्कादायक घटना अहिल्यानगरमध्ये समोर आली आहे. या प्रकरणी कोतवाली पोलीस ठाण्यात दोघा जणांविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, बालाजी अंबादास यनगंदुल (वय २४, रा. नालेगाव, अहिल्यानगर, मूळ रा. करमाळा, सोलापूर) यांनी या संदर्भात पोलीस ठाण्यात रीतसर फिर्याद दिली आहे. त्यांच्या फिर्यादीवरून आरोपी मन अजयकुमार कांकरीया व अभिनंदन अजयकुमार कांकरीया (दोघे रा. चिचोंडी पाटील, ता. जि. अहिल्यानगर) यांच्या विरोधात फसवणुकीचा गुन्हा नोंदवण्यात आला आहे.
हा संपूर्ण प्रकार ९ ऑगस्ट २०२५ ते २५ मार्च २०२६ या कालावधीत अहिल्यानगरमधील कायनेटीक चौक परिसरात घडला. आरोपींनी फिर्यादी बालाजी आणि त्यांच्या ओळखीच्या लोकांचा विश्वास संपादन केला. शेअर बाजारात पैसे गुंतवल्यास भरघोस परतावा देतो, असे सांगून आरोपींनी त्यांच्याकडून वेळोवेळी ऑनलाईन आणि रोख स्वरूपात एकूण ५८ लाख ८० हजार रुपये उकळले. गुंतवणूक केल्यानंतर काही काळाने फिर्यादी यांनी आपल्या रकमेची आणि नफ्याची मागणी केली. मात्र, आरोपींनी त्यांना टाळाटाळ करणारी उत्तरे देण्यास सुरुवात केली. वारंवार मागणी करूनही आरोपींनी पैसे परत करण्यास स्पष्ट नकार दिला. आपली फसवणूक झाल्याचे लक्षात आल्यानंतर फिर्यादी यांनी पोलिसात अर्ज केला होता. पोलीस निरीक्षक नितीन देशमुख यांच्या मार्गदर्शनाखाली प्राथमिक चौकशी पूर्ण झाल्यावर हा गुन्हा दाखल करण्यात आला असून, पोलीस उपनिरीक्षक दीपक मेढे या प्रकरणाचा पुढील तपास करत आहेत.
0 टिप्पण्या