चेहऱ्यावर जखमा, हातात पेटती सिगारेट अन् डोळ्यांत राग; ‘लव्ह अँड वॉर’मधील विकी कौशलचा धडकी भरवणारा लूक


 मुंबई : संजय लीला भन्साळी यांच्या बहुप्रतिक्षित ‘लव्ह अँड वॉर’ या चित्रपटाची उत्सुकता दिवसेंदिवस वाढत आहे. रणबीर कपूर आणि आलिया भट्ट यांच्यानंतर आता चित्रपटातील तिसरा प्रमुख कलाकार विकी कौशल याचा पहिला लूक समोर आला आहे. विकीचा हा लूक पाहून त्याची चित्रपटातील भूमिका नेमकी काय असणार, याबाबत चाहत्यांमध्ये उत्सुकता निर्माण झाली आहे.

विकी कौशलने सोशल मीडियावर चित्रपटातील आपला पहिला लूक शेअर केला आहे. या पोस्टरमध्ये तो विंटेज अंदाजातील अवतारात दिसत असून, हातात सिगारेट आणि लायटर आहे. चेहऱ्यावर जखमांच्या खुणा, गंभीर भाव आणि डोळ्यांत दिसणारा तीव्र राग यामुळे त्याचा लूक विशेष लक्षवेधी ठरला आहे.

पोस्टर शेअर करताना विकीने ‘नजरें मिलेंगी, लेकिन हटेंगी नहीं!’ असे कॅप्शन दिले आहे. पोस्टरवर चित्रपटाच्या प्रदर्शनाची तारीखही देण्यात आली आहे. ‘लव्ह अँड वॉर’ 21 जानेवारी 2027 रोजी चित्रपटगृहांमध्ये दाखल होणार आहे.

रणबीरनंतर विकीचा लूक चर्चेत

चित्रपटाच्या निर्मात्यांनी याआधी रणबीर कपूरचा पहिला लूक समोर आणला होता. विंटेज स्पोर्ट्स कारमध्ये बसलेला रणबीर या पोस्टरमध्ये दिसत असून त्याच्या हातावर जखमा असल्याचे दाखवण्यात आले होते. त्यानंतर आलिया भट्टचा लूक प्रदर्शित करण्यात आला. लाल रंगाच्या पोशाखातील आलियाचा पोस्टरमधील अंदाजही चर्चेचा विषय ठरला.

आता विकी कौशलचा लूक समोर आल्यानंतर चित्रपटातील या तिन्ही प्रमुख व्यक्तिरेखांमधील नातं आणि संघर्ष काय असेल, याबाबत प्रेक्षकांमध्ये कुतूहल निर्माण झाले आहे. निर्मात्यांनी अद्याप तिन्ही भूमिकांची सविस्तर माहिती जाहीर केलेली नाही.

रोमँटिक वॉर ड्रामाची भव्य मांडणी

‘लव्ह अँड वॉर’ हा रोमँटिक वॉर ड्रामा असल्याचे सांगितले जात आहे. संजय लीला भन्साळी यांच्या दिग्दर्शनामुळे चित्रपटाची भव्यता आणि मांडणी याकडेही विशेष लक्ष लागले आहे. हा चित्रपट हिंदीसोबत तमिळ आणि तेलुगू भाषेतही जगभर प्रदर्शित केला जाणार आहे.

आलिया-रणबीर पुन्हा एकत्र

‘लव्ह अँड वॉर’मधून आलिया भट्ट आणि रणबीर कपूर पुन्हा एकदा एकत्र पडद्यावर दिसणार आहेत. ‘ब्रह्मास्त्र’नंतर या दोघांची ही दुसरी एकत्रित फिल्म आहे. जानेवारी 2024 मध्ये चित्रपटाची अधिकृत घोषणा करण्यात आली होती.

दरम्यान, विकी कौशल आणि संजय लीला भन्साळी पहिल्यांदाच एकत्र काम करत आहेत. चित्रपटाच्या निर्मितीचा मोठा आवाका पाहता त्याचे बजेटही भव्य असल्याचे विविध माध्यमांच्या वृत्तांत नमूद करण्यात आले आहे. मात्र, अधिकृत आकडेवारी निर्मात्यांकडून जाहीर करण्यात आलेली नाही.

आता रणबीर, आलिया आणि विकी या तिन्ही कलाकारांचे लूक समोर आल्यानंतर ‘लव्ह अँड वॉर’च्या कथानकाबाबतचे गूढ आणखी वाढले असून, 21 जानेवारी 2027 रोजी प्रेक्षकांना या त्रिकुटाची पडद्यावरची कहाणी पाहायला मिळणार आहे.

टिप्पणी पोस्ट करा

0 टिप्पण्या