दोन सेंटीमीटरने हुकलं सुवर्ण; अन्सी सोजनची ‘थलपथी विजय’ यांच्याकडून फोनची अपेक्षा


 मुंबई : आशियाई क्रीडा स्पर्धेच्या लांब उडीच्या अंतिम फेरीत अवघ्या दोन सेंटीमीटरच्या फरकाने सुवर्णपदक हुकले असले, तरी भारताच्या अन्सी सोजनने रौप्यपदकाची कमाई करत आपली छाप पाडली. जपानमधील आयची-नागोया येथे सुरू असलेल्या २०व्या आशियाई क्रीडा स्पर्धेत ६.५३ मीटरची उडी नोंदवत अन्सीने दुसरे स्थान मिळवले. मात्र, पदक जिंकल्यानंतर तिच्या मनात एका खास व्यक्तीच्या फोनची प्रतीक्षा असल्याचे तिने सांगितले.

‘त्यांचा फोन आला तर मला खूप आनंद होईल’

अन्सी सोजन ही दक्षिण भारतीय अभिनेता आणि तमिळनाडूचे मुख्यमंत्री थलपथी विजय यांची चाहती आहे. स्पर्धेनंतर प्रसारमाध्यमांशी बोलताना तिने विजय यांच्याकडून फोन येण्याची इच्छा व्यक्त केली.

“मला आशा आहे की त्यांच्याकडून मला फोन येईल. त्यांचे प्रेरणादायी भाषण आणि विचार मला खूप आवडतात. त्यांचा फोन आला तर मला प्रचंड आनंद होईल,” अशी भावना अन्सीने व्यक्त केली.

यापूर्वी नवी दिल्लीतील भारतीय ॲथलेटिक्स स्पर्धेत सुवर्णपदक जिंकल्यानंतर अन्सीने विजय यांच्या प्रसिद्ध ‘विजय पोझ’ची नक्कल करत आपला आनंद साजरा केला होता.

शेवटच्या प्रयत्नात चीनच्या खेळाडूची बाजी

महिलांच्या लांब उडीच्या अंतिम फेरीत अन्सीने सुरुवातीपासूनच पदकाच्या शर्यतीत आघाडी घेतली होती. दुसऱ्या प्रयत्नात तिने ६.५३ मीटरची उडी मारत अव्वल स्थान पटकावले होते.

मात्र, अंतिम टप्प्यात चीनच्या हुआंग यिंगयिंगने अखेरच्या प्रयत्नात ६.५५ मीटरची उडी नोंदवली. त्यामुळे अन्सीपेक्षा अवघे दोन सेंटीमीटर अधिक अंतर नोंदवत तिने सुवर्णपदकावर कब्जा केला.

अन्सीने अखेरच्या प्रयत्नात ६.४९ मीटरची उडी मारली. मात्र, सुवर्णासाठी आवश्यक अंतर गाठता न आल्याने तिला रौप्यपदकावर समाधान मानावे लागले.

अंजू बॉबी जॉर्ज यांच्यानंतर अन्सीचा विक्रम

आशियाई क्रीडा स्पर्धेत लांब उडीमध्ये सलग दुसऱ्यांदा रौप्यपदक जिंकत अन्सीने आणखी एक विक्रम आपल्या नावावर केला आहे.

हँगझोऊनंतर आयची-नागोया आशियाई क्रीडा स्पर्धेतही पदक जिंकणारी अन्सी ही आशियाई क्रीडा स्पर्धेच्या लांब उडी प्रकारात एकापेक्षा अधिक पदके मिळवणारी अंजू बॉबी जॉर्ज यांच्यानंतरची दुसरी भारतीय महिला खेळाडू ठरली आहे.

सुवर्णपदक अगदी हाताशी येऊनही दोन सेंटीमीटरने दूर गेले असले, तरी अन्सीच्या या कामगिरीने भारतीय ॲथलेटिक्समध्ये तिचे स्थान पुन्हा अधोरेखित केले आहे.

टिप्पणी पोस्ट करा

0 टिप्पण्या