नवी दिल्ली : भारतीय महिला संघाने आशिया चषकात पाकिस्तानचा अक्षरशः धुव्वा उडवत दणदणीत विजय नोंदवला. भारतीय फिरकीपटूंच्या भेदक माऱ्यासमोर पाकिस्तानचा डाव अवघ्या ५५ धावांत आटोपला. त्यानंतर भारताने केवळ ८.४ षटकांत तीन गडी गमावत ५७ धावा करत सात विकेट्सने सामना खिशात घातला. या विजयासह भारताने गटातील सलग तिसऱ्या विजयाची नोंद करत दिमाखात आगेकूच केली.
उपांत्य फेरीतील स्थान आधीच निश्चित झालेल्या भारतीय संघासाठी हा गटातील अखेरचा सामना होता. त्यामुळे सामन्याचा निकाल भारताच्या पुढील वाटचालीवर परिणाम करणारा नसला, तरी पाकिस्तानविरुद्धची लढत प्रतिष्ठेची होती. भारतीय खेळाडूंनीही मैदानावर त्याच आक्रमकतेने खेळ करत पाकिस्तानला कोणतीही संधी दिली नाही.
फिरकीसमोर पाकिस्तानची फलंदाजी ढेपाळली
नाणेफेक जिंकून पाकिस्तानची कर्णधार फातिमा सना हिने प्रथम फलंदाजीचा निर्णय घेतला. सुरुवातीला पाकिस्तानच्या सलामीवीरांनी २७ धावांची भागीदारी करत चांगली सुरुवात केली. मात्र, पहिली विकेट पडल्यानंतर त्यांचा डाव अक्षरशः कोसळला.
भारतीय फिरकीपटूंनी पाकिस्तानच्या फलंदाजांना एकामागून एक तंबूत पाठवत धावसंख्येला लगाम घातला. श्री चरणीने तीन, प्रेमा रावतने तीन, दीप्ती शर्माने दोन, तर शफाली वर्माने एक विकेट घेत पाकिस्तानच्या फलंदाजीचा कणा मोडला.
२७ धावांवर पहिली विकेट गमावल्यानंतर पाकिस्तानने उर्वरित नऊ विकेट्स अवघ्या २८ धावांत गमावल्या. परिणामी त्यांचा संपूर्ण डाव ५५ धावांवर संपुष्टात आला. ही पाकिस्तानची महिला टी-२० आंतरराष्ट्रीय क्रिकेटमधील आतापर्यंतची सर्वात कमी धावसंख्या ठरली.
शफालीचा षटकार; फातिमा सनाची झुंज
अवघ्या ५६ धावांचे लक्ष्य घेऊन मैदानात उतरलेल्या भारताने आक्रमक सुरुवात केली. शफाली वर्माने सामन्याच्या पहिल्याच चेंडूवर षटकार ठोकत भारताचा इरादा स्पष्ट केला. मात्र, फातिमा सनाने दुसऱ्या षटकात शफालीला १२ धावांवर बाद करत भारताला पहिला धक्का दिला.
याच षटकात प्रतिका रावलही बाद झाली. त्यानंतर फातिमा सनाने स्मृती मानधनालाही चौथ्या षटकात पायचीत करत भारताला आणखी एक धक्का दिला. पाकिस्तानच्या कर्णधाराने तीन विकेट्स घेत चांगली झुंज दिली; मात्र उर्वरित गोलंदाजांना भारतीय फलंदाजांवर दबाव निर्माण करण्यात अपयश आले.
अखेर भारतीय संघाने ८.४ षटकांत लक्ष्य गाठले. कर्णधार हरमनप्रीत कौरने विजयी षटकार ठोकत भारताच्या शानदार विजयावर शिक्कामोर्तब केले.
पाकिस्तानचा भारताविरुद्ध पराभवाचा सिलसिला कायम
या पराभवासह पाकिस्तानचा भारताविरुद्धचा खराब विक्रम कायम राहिला. ऑक्टोबर २०२२ पासून पाकिस्तानने भारताविरुद्धचे सलग चार सामने गमावले आहेत. फातिमा सनाच्या नेतृत्वाखालील संघाला यावेळी हा पराभवाचा सिलसिला खंडित करण्याची संधी होती; मात्र भारतीय फिरकीपटूंच्या प्रभावी कामगिरीमुळे त्यांचे हे स्वप्न पुन्हा अपूर्ण राहिले.
भारतीय संघाने आधी गोलंदाजीने पाकिस्तानचा डाव उद्ध्वस्त केला आणि त्यानंतर अवघ्या ५२ चेंडूंत लक्ष्य गाठत आशिया चषकातील आपले वर्चस्व पुन्हा एकदा सिद्ध केले.
0 टिप्पण्या