मुंबई : अभिनेत्री सई ताम्हणकर सध्या तिच्या ‘अडकित्ता’ या चित्रपटातील भूमिकेमुळे चर्चेत आहे. चित्रपटातील तिच्या अभिनयाचे कौतुक होत असतानाच अभिनेत्री आरती सोलंकी हिने सईचे विशेष कौतुक केले आहे. सोशल मीडियावरील पोस्टमधून आरतीने सईच्या आजवरच्या प्रवासाचा उल्लेख करत मराठी प्रेक्षकांच्या मानसिकतेवरही भाष्य केले आहे.
‘फू बाई फू’सारख्या कार्यक्रमातून घराघरांत पोहोचलेल्या आरती सोलंकीने सई ताम्हणकरच्या अभिनयातील वैविध्याचे कौतुक केले. ‘अडकित्ता’ पाहताना सईचा सुरुवातीच्या काळातील प्रवास डोळ्यांसमोर आल्याचे तिने म्हटले आहे. बोल्ड भूमिका असोत, साध्या-सोज्वळ स्त्रीची व्यक्तिरेखा असो, निवेदिकेची भूमिका असो किंवा हिंदी चित्रपटांमधील काम असो; सईने वेगवेगळ्या भूमिका साकारत स्वतःची स्वतंत्र ओळख निर्माण केली, असे आरतीने नमूद केले.
‘आपण मराठी अभिनेत्रींना किंमत देत नाही’
आरती सोलंकीने आपल्या पोस्टमध्ये मराठी प्रेक्षकांच्या दृष्टिकोनावरही प्रश्न उपस्थित केला. बॉलिवूडमधील अभिनेत्रींचे मोठ्या प्रमाणावर कौतुक केले जाते; मात्र मराठी चित्रपटसृष्टीतील अभिनेत्रींना अपेक्षित मान-सन्मान मिळत नाही, अशी खंत तिने व्यक्त केली.
बॉलिवूडमधील काही अभिनेत्रींना अभिनयाची पुरेशी जाण नसतानाही प्रेक्षक त्यांना सहज ‘सुपरस्टार’चा दर्जा देतात. मात्र मराठी चित्रपटसृष्टीतील अभिनेत्रींच्या कामाकडे तुलनेने दुर्लक्ष केले जाते, असा टोला आरतीने लगावला.
सईसह या अभिनेत्रींनाही ‘सुपरस्टार’ म्हणा
आरतीने आपल्या पोस्टमध्ये सई ताम्हणकरसोबत प्रिया बापट, छाया कदम आणि अमृता खानविलकर यांच्याही कामाचा उल्लेख केला. या अभिनेत्री केवळ मराठी चित्रपटांपुरत्या मर्यादित नसून हिंदी चित्रपट, वेब मालिका आणि मराठी रंगभूमीवरही उल्लेखनीय काम करत असल्याचे तिने सांगितले.
अनेक वर्षांच्या संघर्षानंतर या अभिनेत्री आजच्या स्थानावर पोहोचल्या आहेत. त्यामुळे प्रेक्षकांनीही आपला दृष्टिकोन व्यापक करून मराठी कलाकारांच्या कामाचे मनापासून कौतुक करावे, असे आवाहन आरतीने केले आहे.
सई ताम्हणकरच्या ‘अडकित्ता’तील भूमिकेच्या निमित्ताने आरती सोलंकीने केलेली ही पोस्ट सध्या चर्चेत आली असून, मराठी कलाकारांना त्यांच्या कामासाठी योग्य दाद मिळावी, या मुद्द्याला पुन्हा एकदा अधोरेखित केले आहे.
0 टिप्पण्या